DAVAO CITY – Ubay-ubay na nga mga indibidwal ang gipailalom sa community surveillance swab testing sukad nga gisugdan ang nahisgutan nga lakang sa milabay nga Marso 31 ning kasamtangan nga tuig.
Ang nahisgutan nga lakang adunay kalabutan sa gipahugtan nga lakang sa lokal nga kagamhanan aron nga mapugngan ang mega surge.
Kahinumduman nga pipila sa mga gipailalom sa testing ang gilangkuban sa mga trabahante sa business ug commercial establishments, private ug government offices, public markets, places sa worship, detention facilities ug daghanan pa.
Una ng nagpahigayon ang lokal nga kagamhanan ug libre nga testing alang sa mga street vendors sa siyudad partikular na sa Ramon Magsaysay Street, Monteverde Avenue, Magsaysay Park, ug Quezon Boulevard.
Kahinumduman nga sa milabay nga adlaw, mikabat sa 100 sidewalk vendors sa San Pedro Street ang gipailalom sa surveillance swabbing nga gipahigayon sa city government pinaagi sa Davao City Health Office (CHO) atubangan sa City Hall.
Mikabat sa 3,000 ka mga indibidwal ang mipailalom sa boluntaryo nga pagpailalom sa reverse transcription-polymerase chain reaction (RT-PCR) test sa mga identified areas sa siyudad sukad nga nagsugod ang community testing.
Kahinumduman nga target sa lokal nga kagamhanan nga ipailalom sa test ang 1,000 ka nga indibidwal matag adlaw.
Una ng gimando ni Davao City Mayor Inday Sara Duterte ang COVID-19 Response Cluster sa siyudad nga hugtanon nga imonitor ang mga dapit nga sagad dagsaon sa mga tawo ilabi nga taas ang risgo sa nahisgutan nga mga dapit.
