Gibarugan ni Commission on Audit auditor Xylene del Campo nga adunay mga iregularidad sa paggamit sa Office of the Vice President sa ₱375 million confidential funds kaniadtong 2023.
Sa ika-15 nga adlaw sa impeachment trial ni VP Sara Duterte, giingon ni Del Campo nga kulang ang mga dokumentong gisumite sa OVP aron mapamatud-an ang pipila ka gasto, lakip na niini ang rewards, supplies, medical ug food aid.
Matud niya, wala usab igo nga dokumento nga nagpakita sa resulta sa information gathering o surveillance nga gigamit nga basihan sa pipila ka bayad.
Gipunting usab niini nga dili mahimong gamiton ang confidential funds alang sa reimbursement sa surveillance expenses tungod kay supak kini sa Joint Circular No. 2015-01.
Hinuon, wala makahatag og klarong tubag ang auditor kung tinuod ba o hinimo-himo lamang ang pipila ka ngalan sa mga recipient nga giusisa sa defense.
Sa laing bahin, gipatawag sa impeachment court sila kanhing OVP special disbursing officer Gina Acosta ug kanhing DepEd SDO Edward Fajarda aron motestigo sa Agosto 17 hangtod 19.
