Gipalig-on sa Davao City Health Office ang kampanya sa mga barangay aron mas sayo nga mailhan ug maatiman ang mga residente nga adunay taas nga risgo sa stroke.
Matod ni Dr. Vince Joseph Orpeza, Non-Communicable Disease Medical Coordinator sa CHO, padayon ang libreng medical consultation, tambal, laboratory services, nutrition counseling, mental health counseling ug physical therapy alang sa mga pasyenteng adunay stroke.
Dugang pa, kapin 2,000 ka stroke outpatients ang natala sa Southern Philippines Medical Center sukad 2025, hinungdan nga mas gipakusog ang pagmonitor sa komunidad.
Sumala pa sa CHO, importante ang regular nga check-up aron sayong makita ang mga kondisyon nga makapataas sa risgo sa stroke.
Lakip sa gitutokan ang high blood pressure, diabetes, hypertension ug obesity nga mahimong mahibal-an pinaagi sa health screening sa barangay level.
Sa pagkakaron, giawhag ang mga Dabawenyo nga moduol sa pinakaduol nga health center aron magpa-check-up ug makakuha sa libreng serbisyo sa lokal nga panggamhanan. | VIA BOMBO EROS PAJOTA
