DAVAO CITY – Gipasabot pag-ayo sa mga personahe sa City Health Office (CHO) ngadto sa mga ginikanan ang kamahinungdanon sa pagpabakuna sa mga bata batok polio.
Una ng nanawagan ang ahensiya ngadto sa mga ginikanan nga kinahanglan kompletohon sa mga bata ang bakuna aron masiguro nga ma-protektahan ang ilang mga anak sa nahisgutan nga virus diin pipila ka mga bata na sab ang nakaangkon niini dinhi sa Mindanao.
Kagahapong adlawa girumbo sa mga personahe sa CHO ang Davao City Overland Transport Terminal (DCOTT) sa pagpanguna ni Beth Banzon, Tropical Disease prevention and Control Division head sa CHO ang pagbakuna sa mga anak sa pasahero kini aron masiguro nga maangkon nila ang target nga mas taas sa nauna nga round sa milabay nga Oktubre.
Hinuon dili sumala kalikayan nga adunay mga ginikanan nga mag-alanganin nga ipabakuna ang ilang mga anak apan gipasabot kini pag-ayo sa CHO aron nga makumbinse.
