Misang-at og seryosong protesta ang China human sa pahayag ni Pangulong Ferdinand Marcos Jr. nga posible nga moapil ang Pilipinas kung mosugod ang invasion sa Taiwan.
Sa usa ka pamahayag, giinsistir ni China Foreign Ministry spokesperson Guo Jiakun nga ang Taiwan dili ikalimod nga kabahin sa China ug ang paghusay sa isyu niini usa lamang ka internal nga butang nga para sa China ra, busa walay laing nasod ang angay nga manghilabot.
Gipadayag usab sa China nga kabahin sa ilang teritoryo ang Taiwan ug naghulga nga gamiton ang pwersa aron kini mabalik ilalom sa ilang kontrol.
Gipahimangnoan pa sa opisyal sa China si Pangulong Marcos nga mitugot kuno ang Pilipinas nga motuman sa one-China policy ug sa esensya sa China-Philippines Joint Communique nga naglatid sa pagtukod sa diplomatikong relasyon, ug likayan ang “pagdula og kalayo” sa mga isyung may kalabotan sa interes sa China.
Una niini, sa interbyu sa Indian media atol sa state visit sa Pangulo sa India, gipangutana siya kung andam ba siyang tugotan ang Amerika nga gamiton ang mga pasilidad ug base militar sa Pilipinas aron depensahan ang Taiwan kung moatake ang China.
Tubag sa Pangulo, walay rason nga dili moapil ang Pilipinas, ilabi na nga duol ra kini sa Taiwan.
Gihatagan niya og pananglitan ang Ilocos Norte, diin anaa ang kapitolyo sa Laoag nga 14 minutos lang ang biyahe sa eroplano padulong sa Kaohsiung City sa Taiwan.
Gipatin-aw usab sa Pangulo nga usa sa mga hinungdan sa posibleng pag-apil sa Pilipinas mao ang presensya sa daghang overseas Filipino workers (OFWs) sa Taiwan, ug kon magsugod ang gubat, andam ang nasod nga gamiton ang tanang kapasidad aron ma-evacuate dayon ang mga Pilipino nga anaa didto.
