DAVAO CITY – Gipahimangnoan karun sa City Disaster Risk Reduction and Management Office (CDRRMO) head Rodrigo Bustillo ang mga residente nga nanimuyo daplin sa Davao river nga mas maayong muadto una sa mga evacuation center sanglit padayon karun nga taas ang tubig baha.
Kahinumduman nga anaa sa code red ang Bankerohan river bisan nga wala nakasinate ug kusog nga pagbundak sa ulan ug posibleng gikan kini sa lagyong mga dapit nga nakasinate karon ug mga pag-ulan hatud sa Low Pressure Area (LPA).
Nasayran nga sayo pa lamang kaganina, nagpahimangno na ang buhatan sa mga nanimuyo daplin sa kasapaan nga mubakwit una ug dili hulaton ang musaka ang tubig arun nga dili mabutang sa risgo ang kinabuhi.
Pabilin matud pa ang maong kamandoan hangtud nga dili masiguro nga dili moubos ang tubig baha.
Hinuon adunay pipila sa mga residente ang mibakwit apan kadaghanan pa gihapon ang nagmagahi.
