Gibanabanaan nga anaa sa 120,000 ka mga tawo ang mitambong sa misa ni Pope Leo XIV sa usa ka stadium sa Douala, ang labing dakong siyudad sa Cameroon, isip kabahin sa iyahang pagbisita sa upat ka nasod sa Africa.
Gipahigayon ang misa sa Japoma Stadium ubos sa hugot nga seguridad.
Adunay mga deboto nga nagpalabay pa og gabii gawas sa venue aron makakita sa Santo Papa. Sa iyang mensahe, nanawagan si Pope Leo nga likayan ang kapintasan bisan pa sa kakabus.
Gibutyag usab niya nga adunay igo nga kapaninguhaan alang sa tanan kung kini husto nga ipanghatag.
Sa iyang pagbisita, iyahang gisaway usab ang dili patas nga kahimtang sa kalibutan ug ang impluwensya sa makusganong mga nasod. Kahinumduman nga una na usab siyang kritikal sa pipila ka lider, lakip si US Pres. Donald Trump.
Samtang, padayon nga nag-atubang ang Cameroon sa mga hagit sa seguridad ug politika ubos sa liderato ni President Paul Biya.
Bisan paman niini, mainiton gihapon ang pagdawat sa katawhan ngadto sa Santo Papa, nga naghatag og paglaum ug inspirasyon sa maong nasod.
