Gikataho nga gidakop sa Iran ang duha ka barko sa Strait of Hormuz niadtong Miyerkules, taliwala sa nagpadayon nga tensyon sa rehiyon.
Matod sa report, giharang sa Islamic Revolutionary Guards Corps ang mga barko tungod sa giingong maritime violations ug gidala kini sa baybayon sa Iran.
Kini ang unang taho sa aktwal nga pagdakop og barko sukad miulbo ang kagubot.
Samtang, usa ka British maritime security agency ang mitaho nga adunay tulo pa ka barko nga naigo og bala sa maong agianan sa lana nga usa sa labing importante nga shipping route sa kalibutan.
Sa kasamtangang sitwasyon, mibutyag si Trump nga temporaryong gihunong niini ang planong pag-atake sa Iran human sa hangyo sa Pakistani mediators, bisan wala pa’y klaro ang pagpadayon sa peace talks.
Apan, gibutyag gihapon niini nga anaa gihapon ang presensya sa U.S. naval blockade batok sa mga barko sa Iran.
Sa laing bahin, giingon sa Iran nga ang blockade usa ka “act of war” ug nagpasidaan nga dili nila ablihan ang Strait of Hormuz samtang nagpadayon ang giingong pagpamugos sa Amerika.
Gikakatao usab nga nadungog ang mga buto sa pusil sa pipila ka barko sulod sa strait, lakip ang mga container ships nga giingong giatake samtang naglawig sa maong kadagatan.
