Subling nagpahinumdom sa publiko ang lokal nga kagamhanan sa Island Garden City Of Samal kabahin sa pagbawal sa pag-gamit sa plastic nga ginagamit sa pagpamalit ilabi na sa mga palengke og mga nagkadaiyang establisemento.
Subay sa Ecological Solid Waste Management Act of 2000 ug sa Samal Island Environmental Code of 2018 (City Ordinance No. 2018-293), ang paggamit sa pipila ka single-use plastics ug styrofoam gina-regulate na kini aron mapakunhod ang polusyon ug mapanalipdan ang kahimsog sa publiko.
Subay sa maong balaod, gidili na ang pag-gamit sa Plastic Sando Bags (Single-Use Plastic).
Dili tugotan nga gamiton sa pagbalot sa uga ug basa nga mga produkto, apan adunay exception nga pwede ang “labo bags” alang sa basa nga produkto sama sa isda, karne, ug uban pa.
Gidili na usab ang pag-gamit sa Plastic Cups, Straws, ug Utensils. Lakip sa mga single-use plastics nga gidili mao ang Plastic cups, Plastic straws, Plastic spoon ug fork, ingon man ang Styrofoam Food Packaging.
Samtang dili na usab mamahimong gamiton sa pagkaon lakip sa prutas ug gulay.
Kabahin usab sa maong balaod ang pagdili sa pag-apod-apod o pagbaligya sa mga gidili nga mga plastik. Dili tugotan ang mga negosyo nga maghatag o magbaligya niini sa bisan asang lugar sa IGACOS.
Hinuon luyo sa mga regulasyon kabahin sa maong ordinansa, gipaklaro sa LGU nga adunay gitugot sa balaod nga mamahimong gamiton alang sa mga mahimong sudlanan, sama sa Paper bags, Eco bags, Reusable bags, Reusable containers ug Packaging nga gihatag sa customer.
Mahitungod usab niini, gipaklaro sa lokal nga panggamhanan nga adunay ipatuman nga mga silot sama sa penalties alang sa mga mosupak sa maong balaod.
Alang sa sa mga business establishments, adunay multa sa 1st offense nga P500, 2nd offense: P1,000, 3rd offense: P1,500.00 ug dili molapas og Unom ka bulan nga pagkabilanggo.
