Giklaro ni Senate Minority Leader Alan Peter Cayetano nga wala siya mangayo og “ceasefire” kang Senador Panfilo “Ping” Lacson kalabot sa ilang panaglalis bahin sa giingong mga “ghost projects” sa Taguig City.
Ang pahayag ni Cayetano maoy tubag sa social media post ni Lacson nga nag-ingon nga adunay usa ka senador nga kuno “pabulong” nga nangayo nga undangon na ang ilang panagbangi, bisan wala kini maghisgot og ngalan.
Matod ni Cayetano, adunay pipila ka mga senador nga nagpahayag og kabalaka nga ang ilang pagbinayloay og mga akusasyon mahimong makadaot sa imahe sa Senado, makalihis sa atensyon sa mas importante nga mga isyu, ug makaapekto sa interes sa publiko.
“Noong ako’y nagsasalita, ang daldal ko raw… Noong tumahimik naman ako… baka guilty. Tapos ngayon sasabihin na humihingi ako sa kaniya na itigil na. Hindi po,” matod ni Cayetano.
Gipasiugda usab sa senador nga mas angay tutokan ang mga isyu sama sa pagsaka sa presyo sa kuryente ug lana, online gaming, ug vape, kaysa sa personal nga panaglalis.
Dugang pa niya, andam siyang atubangon ang bisan unsang alegasyon nga ipasaka batok kaniya.
