Namatay ang lima ka tawo samtang lima usab ang nasamdan human molapas sa runway ang usa ka Boeing 767-300 cargo plane atol sa pag-landing sa Miami International Airport.
Matod ni Miami-Dade Fire Rescue Chief Raied “Ray” Jadallah, gikan sa San Juan, Puerto Rico ang cargo aircraft ug molanding unta sa Miami sa dihang mipadayon kini lapas sa runway ug mibangga sa pipila ka nakaparadang sakyanan.
Tungod sa kusog sa impact, nasunog ang bahin sa eroplano ug adunay mga biktima nga wala dayon makagawas gikan sa ilang mga sakyanan.
Gilayon nga mitubag ang mga rescue team ug gitabangan ang mga na-trap aron mapagawas gikan sa mga sakyanan ug madala sa ospital.
Sa lima ka nasamdan, tulo ang giingong anaa sa critical condition ug padayon nga gitambalan.
Gipahigayon ang clearing ug emergency operations sa palibot sa crash site samtang gisiguro nga walay dugang peligro gikan sa sunog ug debris.
Padayon usab nga gisusi ang kahimtang sa runway ug flight operations sa airport.
Sa pagkakaron, nagpadayon ang imbestigasyon sa Federal Aviation Administration aron matino kung unsay hinungdan sa runway overrun ug kung adunay technical, operational o weather-related factors nga nalambigit sa insidente.| VIA BOMBO EROS PAJOTA
