Misaka na sa 43 ang gikatahong namatay tungod sa epekto sa Habagat ug mga bagyong Luis, Maymay, Neneng ug Pilandok sa nagkalain-laing bahin sa nasud, sumala sa National Disaster Risk Reduction and Management Council o NDRRMC.
Kadaghanan sa mga namatay nalambigit sa landslide ug pagkalumos, samtang adunay usab mga kaso sa electrocution ug natumbahan og kahoy.
Pinakadaghan ang fatalities sa Benguet nga adunay 15, samtang adunay unom sa Rizal, upat sa Batangas, tulo matag usa sa Pangasinan, Zambales ug Caloocan, ug uban pa sa La Union, Pampanga, Quezon, Oriental ug Occidental Mindoro ug Negros Occidental.
Aduna usab 20 ka nasamdan ug lima ka gikatahong missing.
Sa kinatibuk-an, 2.9 million ka pamilya o 10.2 million ka indibidwal ang naapektuhan sa weather disturbances.
Kapin 62,000 ka tawo ang nagpabilin sa 814 ka evacuation centers.
Natala usab ang 3,882 ka partially damaged ug 585 ka totally damaged nga mga balay.
Samtang, padayon gihapon nga nakaapekto ang Habagat sa Luzon ug Visayas, diin gipaabot pa ang occasional rains ug thunderstorms sa pipila ka lugar.| VIA BOMBO EROS PAJOTA
