Kapin P1 bilyon ang gi-alokar alang sa mga biyahe ni Pangulong Ferdinand “Bongbong” Marcos Jr. sa sulod ug gawas sa nasud, lakip na ang mga state visit nga nakatakda sa musunod tuig.
Subay sa 2026 National Expenditure Program, gihatagan ug pondo nga P1,018,304,000 ang mga lokal ug langyaw nga misyon ug state visit sa pangulo.
Lakip niini ang P982,649,000 alang sa Maintenance and Other Operating Expenses (MOOE) ug P35,655,000 alang sa personnel services. Mas ubos kini tandi sa P1,290,352,000 nga budget sa biyahe sa Pangulo alang sa 2025.
Pinaka-ulahi nga biyahe ni Marcos mao ang iyang state visit sa Republic of India. Sa wala pa kini, misuroy usab siya sa Estados Unidos aron magkita ngadto kang US President Donald Trump.
Nipartisipar usab kini sa ASEAN Summit ug summit sa Kuala Lumpur, Malaysia niadtong Mayo.
Gibutyag ni Labor Secretary Bienvenido Laguesma nga nakahimo matud pa og labaw pa sa 200,000 ka trabaho alang sa mga Pilipino ang foreign visits ni Marcos.
Ang mga sektor nga una nga nakamugna ug trabaho mao ang power, renewable energy, ug electronics manufacturing.
Sa tibuok proposed budget sa Office of the President alang sa 2026, misaka kini sa P27.362 bilyon, tandi sa P15.9 bilyon sa kasamtangang national budget.
Sumala pa sa Department of Budget and Management (DBM), nga ang Office of the President ang adunay labing dako nga confidential ug intelligence funds allocation nga P4.5 bilyon.
