DAVAO CITY – Malipayong gisaulog sa Bahay Pag-asa ang ika-14 nga anibersaryo sa pagkatukod niini.
Ang Bahay Pag-asa mao ang residential care center alang sa mga Children-in-Conflict with the Law (CICL) and Children at Risk (CAR) nga anaa ilalom sa pagdumala sa Davao City Social Welfare and Development Office (CSWDO).
Gikanayon ni CSWDO head Marlisa Gallo nga sulod sa daghanang mga katuigan, malipayon sila gumikan nakamugna ang Bahay Pag-asa og daghanang mga oportunidad alang sa mga kabatan-onan nga mabag-o ang ilang kaugalingon ug mahimong maayong miyembro sa katilingban.
Gipasigarbo sab sa opisyal nga gumikan sa maong programa, aduna nay usa ka batan-on ang malampusong nakahuman sa iyang pagtuon sa kursong architecture. Ang Children’s Village- Bahay Pag-asa ang nahimutang sa Barangay Bago Oshiro sa Tugbok District diin usa kini ka 24/7 facility nga gahatag og residential care and services sa mga CICL ug CAR nga nagpaabot sa hukom sa korte.
Ayha nahimong Children’s Village, nasayran nga una kining gitawag nga Lamdag sa Kabataan Boy’s Home. Gitukod kini kaniadtong Agosto 14, 2008 sa SDC Building, Claveria St. ning syudad isip tubag sa Republic Act 9344, o ang Juvenile Justice and Welfare Act of 2006.
Ang selebrasyon sa ika 14 nga anibersaryo ang gitambungan sa 72 ka mga residente, 44 ka mga staffs, mga higala, bisita, donors ug mga partners sa maong center.
