Mihinay na ang Tropical Depression Maymay ug nahimo nang low-pressure area, sumala sa Philippine Atmospheric, Geophysical and Astronomical Services Administration (PAGASA).
Sumala sa weather bulletin nga gipagawas alas 2:00 sa kaadlawon karong Agosto 7,2026 ang kanhi Bagyong Maymay nga adunay international name nga Kujira nagpabilin sulod sa Philippine Area of Responsibility o PAR.
Ang sentro sa maong LPA katapusang namonitor sa gilayong 545 kilometro silangan sa Echague, Isabela. Dugang pa niini, gamay na ang posibilidad nga molig-on pag-usab ang maong LPA ug mahimong tropical depression sulod sa sunod nga 24 oras.
Samtang, padayon usab nga gibantayan sa PAGASA ang Typhoon Dolphin nga anaa sa gawas sa PAR, mga 1,165 kilometro sa amihanang bahin sa Northern Luzon.
Matud sa state weather bureau, ang bagyo adunay kusog nga hangin nga moabot og 140 kilometro kada oras duol sa sentro ug pagbugso nga moabot og 170 kilometro kada oras samtang naglihok paingon sa west-northwest sa tulin nga 20 kilometro kada oras.
Gipasabot sa PAGASA nga ang Typhoon Dolphin padayon nga magpalig-on sa habagat o southwest monsoon nga posibleng magdala og kasarangan hangtod kusog nga pag-ulan sa nagkalain-laing bahin sa Pilipinas sa mosunod nga mga adlaw.
