DAVAO CITY – Gi-inagurahan sa dakbayan sa Davao ang bag-o nga slaughterhouse nga nahimutang sa Brgy. Malagos, Baguio District ning syudad kagahapong adlawa, Setyembre 16.
Gipangunahan mismo ni Davao City Mayor Sebastian “Baste” Duterte ang blessing ug ribbon cutting sa maong bag-ong pasilidad nga giklasipikang double A ug usa ka halal ug non-halal diin aduna kini meat-cutting ug cold storage facilities.
Sumala ni Davao City Economic Enterprise Officer-in-Charge Maximo Macalipes Jr., gikalipay sa ilang buhatan ang pag-apruba sa maong proyekto ug ang suporta nga ilang nadawat sama na lamang sa pinansyal nga hisgutanan aron mamugna kining “world-class” slaughterhouse diri sa syudad.
Dugang pa niini nga ang Manual of Operations alang sa duha ka slaughterhouses ang nahuman na ug nagahulat na lamang sa opisyal nga pagtugot gikan sa Malagos Slaughterhouse Management Board. Gipondohan ang maong slaughterhouses sa Department of Agriculture ilalom sa National Livestock Program, Department of Agriculture XI (BUB) Program, ug the lokal nga panggamhanan sa Davao.
Gawas sa mayor, anaa usab atol sa inagurasyon si Councilor Edgar Ibuyan Sr., Fr. Emmanuel “Bong” Gonzaga, mga department heads nga gipangunahan ni Acting City Administrator Atty. Francis Mark Layog, mga partners gikan sa nasyonal nga panggamhanan ug pipila ka mga empleyado sa gobyerno.
