Gipahibalo nga nakatakda nang ablihan sa September 1, 2026 ang indoor arena nga nahimutang sa Carlos P. Garcia Highway sa Davao City, human sa 14 ka tuig nga konstruksyon nga gisugdan pa niadtong 2012.
Sumala sa impormasyon, adunay seating capacity nga 75,000 ang maong arena, mas dako kumpara sa 55,000 nga kapasidad sa Philippine Arena sa Bulacan, nga giila karon isip usa sa pinakadakong indoor arenas sa kalibutan.
Gidesenyo usab ang pasilidad isip usa ka megastructure nga giingong earthquake-proof ug makahimo sa pagsugakod sa kusog nga linog, lakip na ang magnitude 10 base sa gihatag nga detalye.
Dugang pa, gilauman nga modagsa ang mga bisita ug mga residente sa pag-abli sa pasilidad, ilabi na nga abli usab kini sa publiko.
Ang arena gilauman nga mahimong bag-ong venue sa Davao City alang sa dagkong events, gatherings ug uban pang kalihokan.
Sa pagkakaron, ginatan-aw na ang posibleng pagdagsa sa mga tawo sa opening day, samtang gipaabot ang dugang nga detalye kabahin sa operasyon, access ug mga kalihokan nga ipahigayon sa maong pasilidad human kini pormal nga maablihan sa publiko ug mahimong dugang nga attraction usab sa dakbayan.| VIA BOMBO EROS PAJOTA
