Nasikop sa mga otoridad sa Thailand ang usa ka 57-anyos nga Australian national nga giingong responsable sa pagpatay sa usa ka 17-anyos nga dalagita sa Pattaya City.
Sumala sa imbestigasyon, nakita sa mga higala sa biktima nga nakig-istorya kini sa maong langyaw sa daplin sa baybayon sa Pattaya niadtong Miyerkules sa gabii. Sa kaadlawon, miuban ang dalagita ngadto sa apartment sa suspek diin gituohang didto siya gilumos pinaagi sa pagluok human sa ilang giingong panaglalis.
Paglabay sa duha ka adlaw, nakit-an sa mga pulis ang hubo nga lawas sa biktima nga gisulod sa maleta ug gilabay sa kasagbotan duol sa riles sa tren.
Sa samang higayon, nasikop usab sa Bangkok airport ang suspek samtang andam na unta kining mobiya sa Thailand.
Gipasakaan na siya og mga kasong intentional murder, pagtago ug pagbalhin sa patayng lawas, ug pagdala sa menor de edad alang sa malaw-ay nga katuyoan.
Padayon pa sa pagkakaron ang autopsy sa biktima ug ang dugang nga imbestigasyon aron makompleto ang mga ebidensya batok sa suspek.
