Gikasuhan na sa Philippine National Police ang amahan sa estudyante nga nalambigit sa pagpamusil sa Zamboanga, lakip ang usa ka security personnel sa eskwelahan.
Nag-atubang ang duha sa kasong reckless imprudence resulting in homicide ug physical injury tungod sa giingong pagpasagad nga adunay kalambigitan sa insidente.
Sumala sa Police Regional Office 9, adunay igo nga ebidensiya nga nakolekta atol sa ilang imbestigasyon aron suportahan ang pagsang-at sa kaso batok sa duha.
Nakita sa imbestigasyon ang giingong pagpasagad sa amahan human nakuha sa iyang anak ang government-issued ug personal nga armas nga iya niini.
Samtang, gikasuhan usab ang wala na ginganlang security personnel tungod sa giingong pagpasagad sa pagpatuman sa security measures, nga nakapahimo nga makalusot ang armas sulod sa tulunghaan.
Dugang pa, migawas sa imbestigasyon sa mga awtoridad nga walay nakitang ebidensiya nga adunay laing grupo nga nalambigit o mitabang sa pagpatuman sa krimen.
Ang kaso batok sa amahan ug security personnel padayon nang iproseso base sa mga ebidensiya nga nakalap sa kapulisan atol sa ilang imbestigasyon sa shooting incident.
