Nanghanyo ang kampo sa negosyanteng si Charlie “Atong” Ang sa Department of Justice (DOJ) nga ibasura ang reklamong obstruction of justice nga gisang-at batok sa abogado ni Ang nga si Atty. Caroline Cruz ug sa uban pang mga respondent kalabot sa kaso sa mga namissing nga sabungero.
Matud sa legal counsel ni Atty. Cruz nga si Atty. Isabella Sabio, walay igo nga legal nga basehan ang maong reklamo ug sayop usab ang mga alegasyon nga gisang-at batok sa iyang kliyente.
Gipasabot pa sa abogado nga ang pakigtagbo ni Atty. Cruz sa pipila ka mga kabanay sa mga nawagtang nga sabungero kaniadtong Marso ug Abril gihimo base lamang sa ilang hangyo.
Matud niya, naghatag lamang si Atty. Cruz og pinansyal nga tabang sa pipila ka mga pamilya aron makatabang sa ilang pamasahe ug pagkaon, ug gipasiugda nga kinabubot-on kining gihatag ug walay bisan unsang baylo.
Dugang pa ni Atty. Sabio, ipresentar sa iyang kliyente sa hustong panahon ang mga ebidensya ug testimonya sa mga saksi aron ipasabot ang tinuod nga hinungdan sa pakig-alayon niya sa tulo ka mga complainant.
