Gibatikos ni Vice President Sara Duterte ang Philippine National Police o PNP tungod sa iyang giingong paglihok niini isip “enforcement arm” sa mga politiko, imbes nga magpabiling independente ug walay gidapigan.
Sa iyang pahayag niadtong Sabado, Nobyembre 21, gikuwestiyon ni Duterte ang pag-angkon sa PNP nga apolitical kini human gipatin-aw sa kapulisan nga walay nahitabong rescue operation sa iyang kanhing household staff ug upat pa ka indibidwal sa usa ka hotel sa Taguig City niadtong Nobyembre 17.
Matud sa bise presidente, wala kuno maghimo og hustong imbestigasyon ang PNP sa maong insidente ug dali ra kining nakahimo og konklusyon bisan wala pa matino ang tanang detalye.
Gipadayag usab ni Duterte nga aduna siyay lima ka dokumentadong hulga nga giingong gihimo sa mga personahe sa PNP batok kaniya, sa iyang pamilya ug sa mga kawani sa Office of the Vice President.
Gikuwestiyon usab niya ang kahigayunan nga maipresentar ang maong mga ebidensiya sa impeachment proceedings tungod sa giingong pag-atras sa prosekusyon sa reklamo nga grave threats.
Sa laing bahin, gipasalig ni PNP Chief Police General Jose Melencio Nartatez Jr. nga magpabiling patas ug walay gidapigan ang institusyon, ug ang tanang aksiyon niini ibase sa kamatuoran, ebidensiya ug due process.











