-- ADVERTISEMENT --

Gipalig-on ang panginabuhian sa mga mangingisda sa Barangay Mabila, Sarangani, Davao Occidental pinaagi sa 600 mil pesos nga Fish Venture and Solar Ice Making Project nga gilunsad sa Department of Social Welfare and Development (DSWD) Field Office XI ubos sa Sustainable Livelihood Program (SLP).

Pormal nga giturn-over ngadto sa Curacha Divers SLP Association ang maong proyekto niadtong Nobyembre 19, 2026, diin gitambongan sa mga miyembro sa asosasyon, mga representante sa lokal nga kagamhanan, mga opisyal sa SLP, mga lider sa barangay ug uban pang stakeholders.

Pinaagi sa 600 mil pesos nga Seed Capital Fund, makapatukod ug makapadagan ang asosasyon og livelihood venture nga magsuporta sa ilang mga kalihukan sa pagpangisda ug pagbaligya sa mga isda. Kabahin sa maong proyekto ang Solar Ice Making Project nga gitumong sa paghatag og igong suplay sa yelo aron mapadayon ang kabag-o ug kalidad sa mga isdang ilang makuha gikan sa dagat.

Gilauman nga makatabang kini sa pagpakunhod sa pagkadaot sa ilang mga produkto, pagpalambo sa pagdumala sa mga isda human sa pangisda ug pagpauswag sa ilang pagpamaligya.

Pinaagi sa maong inisyatibo, gitumong sa DSWD nga dili lamang mapalapad ang panginabuhian sa mga mangingisda kondili mapalig-on usab ang ilang kapasidad sa pagpadagan sa usa ka malungtarong negosyo nga makadugang sa kita sa ilang mga pamilya.

-- ADVERTISEMENT --