-- ADVERTISEMENT --

Gipakusgan sa Davao del Sur Police Provincial Office (DSPPO) ang ilang kampanya batok sa kriminalidad nga miresulta sa pagkadakop sa 13 ka wanted persons atol sa sunod-sunod nga operasyon sa tibuok probinsya.

Gipangulohan ni PCOL Werenfredo S. Regidor Jr., Provincial Director, ang maong law enforcement ug crime prevention operations nga gihimo gikan alas-6 sa buntag, Nobyembre 9 hangtod alas-6 sa buntag, Nobyembre 15, 2026.

Narekord usab sa kapulisan ang siyam ka loose firearms nga na-account ug usa ka operasyon batok sa ilegal nga droga isip kabahin sa ilang kampanya sa pagpalig-on sa seguridad.

Gipahigayon usab ang 2,346 ka operasyon alang sa pagpatuman sa mga lokal nga ordinansa, nga miresulta sa 1,613 ka indibidwal nga nadakpan o gihatagan og multa.

Lakip sa mga natala nga kalapasan ang 125 ka curfew violations, 2,537 ka traffic violations, 209 ka pag-inom og makahubog nga ilimnon sa publikong lugar, ug 189 ka paglapas sa smoking ban.

-- ADVERTISEMENT --

Gipasalig sa DSPPO nga magpadayon ang ilang hugot nga pagpatuman sa balaod ug mga operasyon batok sa kriminalidad aron mapadayon ang kalinaw, kahapsay ug kaluwasan sa mga komunidad sa tibuok Davao del Sur.