Naglaum ang Office of the Ombudsman nga mahuman sulod na lamang sa usa ka tuig ang pagproseso sa plunder case batok kang kanhi House Speaker Martin Romualdez nga nalambigit sa giingong anomalya sa flood control projects.
Sumala kang Ombudsman Jesus Crispin Remulla, makatabang sa pagpadali sa kaso ang pagsurender ni Samchan Foreign Exchange Corp. President Felicito Guevarra, nga naakusahang kauban ni Romualdez ug kanhi Ako-Bicol party-list Representative Zaldy Co.
Gibalik ni Guevarra sa gobyerno ang 324 milyones pesos nga giingong iyang nadawat isip komisyon gikan sa mga transaksiyon nga gilangkit sa maong kaso.
Gihatagan usab siya og conditional immunity human mopirma si Remulla sa kasabutan nga magtugot kaniya nga magsilbing state witness sa Ombudsman.
Gipasabot ni Remulla nga andam na ang ilang mga ebidensiya ug gusto niyang mapadali ang presentasyon niini sa korte aron malikayan ang mga taktika nga posibleng makapalangay sa paghusay sa kaso.
Matud pa niya, adunay mga kaso kaniadto nga mokabat pa og 15 ka tuig sa dili pa mahuman, apan gilauman niyang mapaspasan kini ngadto sa usa ka tuig.
Kahinumdoman nga nag-atubang sila Romualdez ug Co og P7.44 bilyones nga plunder case tungod sa giingong pagkuha og komisyon gikan sa mga kontrata sa flood control projects.
Gisurender ni Guevarra ang iyang kaugalingon ngadto sa National Bureau of Investigation o NBI niadtong Nobyembre 19 human gihangyo sa prosekusyon ang pagkansela sa iyang pasaporte.
Samtang, nagpabilin nga gibalibaran nila Romualdez ug Co ang mga alegasyon batok kanila.











