Gideklarar ang nasudnong kalamidad sa Fiji ug kahimtang sa emerhensiya sa Tonga tungod sa grabeng hulaw nga miresulta sa kakulang sa suplay sa tubig sa maong mga nasod sa rehiyon sa South Pacific.
Matod sa gobyerno sa Fiji, miabot na sa lebel sa krisis ang padayong epekto sa El Niño sa rehiyon, hinungdan nga gideklarar niini ang nasudnong kalamidad.
Gipaambit ni Fiji Prime Minister Sitiveni Rabuka ang dakong kabalaka sa mga pamilya sa ilang nasud kalabot sa pagkaanaa sa suplay sa tubig ug sa epekto sa dugayng panahon sa hulaw sa ilang adlaw-adlaw nga panginabuhi.
Base sa mga lokal nga taho, miabot na sa makapabalaka nga lebel ang suplay sa tubig sa nasud, diin daghang mga trak ang gipadala sa mga awtoridad aron maghatod og tubig sa mga baryong grabeng naapektuhan sa hulaw.
Samtang, nag-atubang usab og susamang krisis ang Tonga diin gideklarar ang 27 ka adlaw nga kahimtang sa emerhensiya tungod sa kakulang sa suplay sa tubig nga resulta sa grabeng hulaw.
Matod ni Acting Prime Minister Viliami Latu, makatabang ang maong deklarasyon aron mas dali nga makatubag ang mga emergency service sa mga panginahanglan sa katawhan nga may kalabotan sa krisis.











