Nadakpan ang duha ka giingong high-value individual atol sa buy-bust operation sa kapulisan sa Barangay J.P. Laurel, Panabo City, Davao del Norte pasado alas 10:25 sa gabii niadtong nakalabayng adlaw.
Giila lamang ang mga nadakpan sa alyas “Boss” ug alyas “Jhon” nga nasikop sa operasyon sa Panabo City Police Station, kauban ang mga personahe sa 2nd Davao del Norte Provincial Mobile Force Company ug Philippine Drug Enforcement Agency o PDEA.
Nakuha gikan sa mga suspek ang 28 ka sachet sa gituohang shabu nga may gibug-aton nga mokabat sa 51.2 gramos ug gibanabanang kantidad nga 348,160 pesos, base sa Standard Drug Price.
Matud sa kapulisan, napalit ang gidudahang ilegal nga droga pinaagi sa usa ka poseur buyer atol sa operasyon.
Nag-atubang ang duha og kaso tungod sa giingong paglapas sa Section 5 ug Section 11 sa Republic Act 9165 o Comprehensive Dangerous Drugs Act of 2002.
Gihuptan karon ang mga nadakpan sa Panabo City Police Station alang sa dokumentasyon ug tukmang disposisyon.











