-- ADVERTISEMENT --

Gitinguha sa Pilipinas nga makompleto sa dili pa matapos ang tuig ang tanang 19 ka priority economic deliverables ubos sa 2026 Association of Southeast Asian Nations o ASEAN chairmanship niini.

Atol sa ASEAN Summit Plenary Session sa Philippine International Convention Center sa Pasay City, gipahayag ni President Ferdinand Marcos Jr. nga kabahin kini sa paningkamot sa nasud nga mapalig-on ang koneksyon sa rehiyon sa natad sa merkado, enerhiya, imprastraktura, teknolohiya ug pinansya.

Matod ni Marcos, kapin sa 100 ka outcome documents ang napalambo pinaagi sa ASEAN Summit ug mga kalambigit nga panagtigom, resulta sa pipila ka bulan nga koordinasyon ug negosasyon tali sa mga miyembrong nasud ug ilang mga kauban.

Naglangkob ang 19 ka prayoridad sa digitalization ug artificial intelligence, energy security, resilient supply chains, sustainable development, green transition, suporta sa micro, small and medium enterprises o MSMEs, innovation ug creative economy.

Usa sa dagkong kalampusan sa chairmanship sa Pilipinas ang pagpirma sa mga miyembrong nasud sa ASEAN sa Digital Economy Framework Agreement o DEFA kaniadtong Sabado,Nobyembre 15, 2026 nga giila nga unang rehiyonal nga kasabotan sa kalibotan alang sa pagdumala sa digital economy.

-- ADVERTISEMENT --

Tumong sa DEFA nga pasayonon ug masiguro ang digital transactions sa 11 ka miyembrong nasud sa ASEAN ug mapalambo ang digital economy sa rehiyon ngadto sa $2 trillion sa 2030.

Gihulagway ni Trade Secretary Cristina Roque nga dakong kalampusan kini alang sa Pilipinas, samtang gipunting ni ASEAN Business Advisory Council Chair Joey Concepcion nga ang gagmay ug medium nga negosyo angay unang makabenepisyo sa maong kasabotan.

Samtang, nanawagan si East Asia Business Council Chair Jay Yuvallos nga mas ambisyoso ang pagrepaso sa Regional Comprehensive Economic Partnership o RCEP, nga gikonsiderar nga kinadak-ang free trade agreement sa kalibotan.

Nakatakdang repasohon ang RCEP sa 2027, panahon sa ASEAN chairmanship sa Singapore, unang higayon sukad kini gipatuman kaniadtong 2022.

Sa kasamtangan, nagpatuman na ang maong kasabotan og pagpakunhod sa taripa sa 90 hangtod 93 porsyento sa mga produkto sa 15 ka nasud, lakip ang mga miyembro sa ASEAN gawas sa Timor-Leste, Australia, China, Japan, South Korea ug New Zealand.