Gikumpirma sa Bureau of Fire Protection (BFP) nga 16 ka indibidwal ang ilang gipasakaan og kaso may kalabotan sa pagkasunog sa MV June Aster sa Coron, Palawan nga miresulta sa kamatayon sa 77 ka tawo.
Gipahibalo ni BFP spokesperson Fire Senior Superintendent Anthony Arroyo nga gisang-at sa Directorate for Investigation ang mga kaso sa Manila City Prosecutor’s Office kaniadtong Nobyembre 11, 2026.
Naglakip ang mga kaso sa reckless imprudence resulting in multiple homicide, multiple physical injuries ug damage to property.
Lakip sa mga gikasuhan ang unom ka tripulante sa MV June Aster, tulo ka opisyal ug empleyado sa Atienza Interisland Ferries Inc., tulo ka opisyal ug empleyado sa Mega Lifters Cargo Handling Corp. ug third-party contractor sa Philippine Ports Authority (PPA), ingon man upat ka non-commissioned officers sa Philippine Coast Guard nga nakatalaga sa Delpan-Baseco Substation.
Apil usab sa gipasakaan og kaso ang kapitan sa barko nga unang mikalagiw human sa insidente apan misurender pipila ka adlaw ang milabay.
Base sa imbestigasyon sa mga otoridad, nagsugod ang sunog sa likurang bahin sa barko human sa usa ka chemical reaction sa mga kemikal nga gikarga niini.
Kahinumdoman nga nahitabo ang insidente pasado alas-7:00 sa gabii niadtong Setyembre 9, 2026 samtang nagbiyahe paingon sa Coron, Palawan ang barko, diin misilaob ang kalayo ug misunod ang pagbuto.
Kadaghanan sa mga biktima grabeng nasunog ang lawas, samtang walo pa ka pasahero ang gikataho nga missing.
