Gipahayag ni House prosecutor Representative Joel Chua nga mas nalisdan pa kuno ang kampo ni Vice President Sara Duterte sa unang semana sa pagpresentar sa mga ebidensiya sa depensa atol sa nagpadayong impeachment trial sa Senado.
Matod ni Chua, imbis nga mapahuyang ang kaso sa prosecution tungod sa mga testimonya sa depensa, mas naladlad pa kuno sa kalisod ang kampo sa Bise Presidente human moatubang ang ilang mga testigo sa impeachment court.
Sa press briefing sa House prosecution panel niadtong Biyernes, Nobyembre 13, gibalik ni Chua ang pahayag kaniadto ni Duterte nga iyang atubangon ang impeachment proceedings nga “bloodied but unbowed.”
Apan, sumala sa mambabalaud, daw sukwahi niini ang nahitabo atol sa unang semana sa presentasyon sa ebidensiya sa depensa.
Gipasabot ni Chua nga bisan gihatagan og higayon ang depensa nga tubagon ug ipatin-aw ang mga alegasyon batok sa Bise Presidente pinaagi sa ilang mga dokumento ug testigo, wala kuno kini nakapahuyang sa kaso sa prosecution.
Sulod sa upat ka adlaw nga pagdungog gikan Nobyembre 9 hangtod 12, unom lamang sa 24 ka testigo nga unang gilista sa depensa ang aktuwal nga mitestigo atubangan sa impeachment court.
Lakip sa mga mitestigo ang pipila ka opisyal gikan sa Davao City ug Samal nga nagpatin-aw bahin sa mga kabtangan nga nalambigit sa magtiayon nga Duterte-Carpio. Mitestigo usab ang usa ka accountant ug corporate lawyer bahin sa mga rekord pinansiyal ug interes sa negosyo sa Bise Presidente.
Dugang pa niini, duha ka kaila sa magtiayon ang mitubag sa mga pangutana bahin sa pipila ka galastohan, lakip ang pagbayad sa usa ka restawran sa Japan ug pagpalit og mga sapatos sa Malaysia.
Bisan pa niini, giingon sa prosecution nga wala gihapon matubag sa mga testimonya ang mga pangutana bahin sa giingong wala maideklarang mga kabtangan, dagkong deposito ug interes sa negosyo ni Duterte.
Kahinumduman nga gipresentar kaniadto sa prosecution expert witness nga si Atty. Alexander Cabrera ang iyang pagtantiya nga mokabat sa P817.87 milyon ang giingong dili mapatin-aw ug wala maideklarang bahandi sa Bise Presidente gikan sa 2022 hangtod 2025.
Samtang, gipahibalo ni Atty. Michael Poa, tigpamaba sa depensa, nga aduna pa silay walo hangtod napulo ka testigo nga ipresentar sa pagpadayon sa pagtaral.
Gikatakdang ipadayon ang impeachment trial sa Nobyembre 19 human sa temporaryong paghunong sa mga pagdungog tungod sa pag-host sa Pilipinas sa ASEAN Summit.
Magpadayon ang Senate Impeachment Court sa pagtimbang-timbang sa mga ebidensiya nga gipresentar sa prosecution ug depensa sa dili pa magpagawas og desisyon sa impeachment case batok kang Duterte.
