Giklaro sa Department of Social Welfare and Development (DSWD) nga walay kamatuoran ang mikaylap nga pahibalo bahin sa paghunong sa medical, hospital ug burial assistance sugod Nobyembre 9, 2026.
Mitumaw ang maong pagpatin-aw human mikaylap ang mga pahibalo nga gipatik sa pipila ka opisina sa mga politiko ug party-list groups nga nag-ingon nga wala na kunoy assistance gikan sa Southern Philippines Medical Center (SPMC), Department of Health (DOH) pinaagi sa Medical Assistance to Indigent and Financially Incapacitated Patients (MAIFIP), ug DSWD.
Gipasiugda sa ahensya nga wala sila nagpagawas og direktiba nga mohunong ang maong mga programa ug wala usab sila nag-isyu og susamang pahibalo.
Gipasalig usab sa DSWD nga magpadayon ang ilang operasyon ug paghatag og mga serbisyo alang sa publiko, lakip na ang mga programa nga gitagana alang sa mga nanginahanglan og pinansyal nga tabang.
Giawhag sa ahensya ang publiko nga susihon pag-ayo ang tinubdan sa mga pahibalo ug mangayo og kumpirmasyon gikan sa hingtungdang mga opisina sa dili pa motuo o mopakaylap sa impormasyon aron malikayan ang kalibog ug sayop nga pagsabot sa mga serbisyo nga ilang ma-avail.
