Gipahimutang ang mas lig-on nga kooperasyon sa investment ug trade tali sa Davao City ug Singapore pinaagi sa Memorandum of Understanding (MOU) nga gipirmahan sa Davao City Government ug Singapore-based nga kompanyang Sannex Ventures (S) Pte. Ltd. niadtong Nobyembre 13.
Gipangunahan nila Davao City Mayor Sebastian Z. Duterte ug Sannex Ventures CEO Jay Michael Jaboneta ang pagpirma sa kasabutan nga nagtumong sa pagdani og dugang langyaw nga mga investors ug pagpalapad sa oportunidad sa negosyo ug patigayon.
Pinaagi sa maong panag-alayon, gilauman nga mas mapalig-on ang economic ties tali sa Davao City ug Singapore, ilabina sa pag-abli sa dugang oportunidad alang sa mga lokal ug langyaw nga negosyante.
Gilauman usab nga mamahimong dalan ang kasabutan sa pagmugna og dugang trabaho, pagduso sa kalihokan sa ekonomiya ug paghatag og mas daghang oportunidad sa panginabuhian nga makabenepisyo sa mga Dabawenyo.
Sa kinatibuk-an, kabahin kini sa paningkamot sa lokal nga panggamhanan nga mapahimutang ang Davao City isip mas kompetitibo nga destinasyon sa pamuhunan ug negosyo.
