Magpresentar pa og dugang nga mga saksi ang kampo sa depensa ni Vice President Sara Duterte aron motubag sa mga pangutana nga wala masulbad sa nangaging mga pagtug-an, ilabina sa mga isyu kalabot sa iyang Statement of Assets, Liabilities and Net Worth o SALN.
Sumala ni defense spokesperson Atty. Michael Poa, lakip sa ilang gustong klarohon ang kalainan sa mga impormasyon nga anaa sa SALN ni Duterte ug sa mga dokumentong gisumite sa Securities and Exchange Commission o SEC. Kini misunod sa pagpangutana ni Senate President ug presiding officer Francis Escudero kang defense witness Atty. Suzette Balucanag-Punay bahin sa giingong puhunan ni Duterte sa usa ka fast-food branch.
Atol sa maong pagtug-an, giangkon ni Punay nga wala siya kahibalo kon nganong nakadawat og bayad ang Bise Presidente gikan sa maong negosyo. Dugang pa ni Poa, adunay limitasyon ang kahibalo sa matag saksi, hinungdan nga magkinahanglan sila og dugang nga mga testigo aron makahatag og katin-awan sa ubang detalye nga wala matubag sa nangaging mga testimonya.
Sa pagkakaron, kadaghanan sa mga representante sa bangko nga una nilang giplanong ipresentar isip saksi dili na kuno ipatawag, gawas sa usa pa ka representante sa bangko.
Wala pa usab ipadayag sa kampo sa depensa ang identidad sa ilang mga sunod nga saksi.
