Gisusi mismo ni Davao City Police Office (DCPO) City Director PCOL Peter Bauzon Madria ang kahandam ug pag-alisto sa mga kapulisan nga naka-deploy isip patroller sa nagkadaiyang landmark sa Davao City niadtong Nobyembre 9, 2026.
Pinaagi sa on-the-spot inspection, gisuta ni Madria ang presensya, kahimtang ug kahandam sa mga personnel nga gitahasan sa pagpatrolya sa mga importanteng pampublikong lugar sa siyudad.
Nakig-istorya usab ang City Director sa mga patroller aron masuta ang ilang pagpatuman sa mga buluhaton, operational readiness ug pagsunod sa mga security protocol atol sa ilang deployment.
Tumong sa maong inspeksyon nga mapalig-on ang police visibility ug masiguro nga alerto ug andam ang mga kapulisan sa pagresponde sa posibleng insidente nga mahimong makaapekto sa kaluwasan ug kahusay sa publiko.
Gipakita usab sa maong kalihokan ang padayon nga pagmonitor sa DCPO sa mga personnel nga anaa sa field deployment aron mapalambo ang disiplina, accountability ug serbisyo sa komunidad.
