Gidepensahan sa House of Representatives (HOR) ang pagbalhin sa pipila ka pondo ubos sa gisugyot nga 2027 national budget tungod sa hinay nga paggasto sa pipila ka ahensya sa gobyerno.Nabutyag nga mikabat sa P15.33 bilyong pondo alang sa disaster rehabilitation ug reconstruction ang wala magamit ug mahimong ibalhin ngadto sa mga programa nga mas dali nga mapatuman.
Sumala ni Bataan 2nd District Representative Albert Garcia, senior vice chair sa House Committee on Appropriations, natino sa mga magbabalaod atol sa mga pagdungog ang mga programa nga hinay ang pagpatuman ug aduna pay nahibiling pondo.
Gipasabot ni Garcia nga gibalhin ang pipila niini ngadto sa mga prayoridad nga programa aron dili magpabiling nakatengga ang pondo sa gobyerno samtang giayo sa mga ahensya ang ilang sistema sa pagpatuman sa mga proyekto.
Dugang pa niya, piniling mga programa lamang ang naapektuhan sa mga pag-usab ug dili ang kinatibuk-ang badyet sa usa ka ahensya. Samtang, gibutyag ni FPJ Panday Bayanihan Party-list Representative Brian Poe nga ang P15.33 bilyon nga wala magamit nga pondo gikan sa Disaster Rehabilitation and Reconstruction Assistance Program ubos sa National Disaster Risk Reduction and Management Fund, base sa rekord niadtong Hunyo 30, 2026.
Matod ni Poe, nahimong basihan kini sa gisugyot nga pag-amiyenda aron dugangan ang quick response funds sa Department of Social Welfare and Development (DSWD) ug Department of Agriculture (DA). Gipasabot ni Poe nga magpabilin ang katuyoan sa maong pondo alang sa pagtubag sa mga kalamidad, apan ibalhin kini ngadto sa mga ahensyang mas paspas makahatag og tabang sa mga nanginahanglan.
Giawhag usab niya ang mga senador ug civil society organizations nga motabang sa pagsusi kon angay bang kuhaan og pondo ang mga programa nga hinay ang paggasto aron magamit kini sa mas dinaliang panginahanglan. Gihimo ang maong pagpatin-aw taliwala sa mga pangutana kalabot sa P190 bilyong amyenda sa Kamara sa gisugyot nga nasudnong badyet.
