Gipanalipdan sa Department of Foreign Affairs (DFA) ang legal nga awtoridad niini sa pag-isyu og Philippine visa human kuwestiyonon ni Ombudsman Jesus Crispin Remulla ang maong responsibilidad ug miingon nga sakop kini sa Department of Justice (DOJ).
Sumala sa DFA, klarong gilatid sa Administrative Code of 1987 ang gahom sa mga konsulado sa Pilipinas sa pag-isyu og visa ug dili kini awtoridad nga gikan lamang sa DOJ.
Gisupak usab sa ahensya ang sugyot nga ibalhin ngadto sa pribadong service provider ang pagproseso sa visa applications.
Matod sa DFA, mahimong motabang ang pribadong kompanya sa pagdawat ug pagpasayon sa mga aplikasyon, apan magpabilin sa gobyerno ang katungdanan sa pagrepaso, pag-apruba o pagsalikway niini.
Gipanalipdan usab sa DFA ang 14-day visa-free entry alang sa mga Chinese national nga gipatuman subay sa direktiba ni Presidente Ferdinand Marcos Jr. aron mapalig-on ang patigayon, pamuhunan, turismo ug relasyon tali sa Pilipinas ug China.
Misunod kini sa mga taho bahin sa giingong pag-abuso sa visa-free arrangement sa pipila ka langyaw, ilabi na sa mga Chinese national, alang sa ilegal nga mga kalihokan sama sa scam hubs, ilegal nga panarbaho ug operasyon sa Philippine Offshore Gaming Operators (POGO).
Gibug-atan sa DFA nga ang bisan unsang gikatahong pag-abuso sa visa-free entry kinahanglan imbestigahan sa mga hingtungdang awtoridad.
Apan, matod niini, dili awtomatikong nagpasabot ang maong mga insidente nga adunay iregularidad sa ahensya o ilegal ang pagpatuman sa maong polisiya.
Gisalikway usab sa DFA ang mga alegasyon bahin sa pag-isyu og peke nga pasaporte, korapsyon ug paggamit sa mga serbisyo sa ahensya alang sa personal nga panginabuhian.
Gipasiugda sa ahensya nga ang tanang bayad nga nakolekta gikan sa mga serbisyo niini direktang napunta sa gobyerno.
