Patay ang usa ka Pilipinong tripulante human mibuto ang usa ka oil products tanker sa Persian Gulf niadtong Huwebes, Nobyembre 5, sumala sa Department of Migrant Workers (DMW).
Nakasakay ang maong tripulante sa MT Velos Sapphire, usa ka oil products tanker nga naglayag ubos sa bandila sa Marshall Islands ug paingon unta sa Sitrah, Bahrain, sa dihang nahitabo ang pagbuto nga gituohang posibleng resulta sa pag-atake sa drone.
Samtang, sakay usab sa maong barko ang laing 21 ka Pilipinong tripulante nga wala gikatahoang naangol sa insidente.
Samtang padayon pang gipamatud-an ang tinuod nga hinungdan sa pagbuto, nagpaabot og pahasubo ang DMW ngadto sa pamilya sa namatay.
Gipahibalo na usab sa lisensiyadong manning agency ang pamilya kabahin sa pagkamatay sa tripulante ug naghatag na kini og tabang ug giya.Gipasalig usab ni DMW Secretary Hans Leo J. Cacdac nga dili pasagdan sa ahensiya ang pamilya sa namatay ug hatagan kini sa gikinahanglang suporta sa pag-atubang sa maong kalisdanan.
Padayon usab ang koordinasyon sa DMW uban sa tag-iya sa barko ug sa ubang otoridad aron mamonitor ang insidente, matino ang hinungdan sa pagbuto ug masiguro nga mahatag sa pamilya sa biktima ang angay nga tabang.
