Gisaad sa House Committee on Agriculture and Food nga bantayan ang mga nabutyag nga sayop nga coordinates sa mga farm-to-market road o FMR projects nga gilakip sa gisugyot nga 2027 national budget.
Lakip niini ang imbestigasyon nga gipahigayon sa Department of Agriculture (DA) aron matino ang kamatuoran sa maong mga proyekto ug mailhan ang mga responsable sa mga sayop.
Sumala kang Quezon City Representative Mark Enverga, chairman sa maong komite, tumong sa Kongreso nga masuta ang gilapdon sa problema, mapanubag ang mga responsable ug masiguro nga dili na mausab ang susamang insidente.
Gidawat usab ni Enverga ang pasalig ni DA Secretary Francisco Laurel Jr. nga susihon ang tanang proyekto nga nalambigit sa isyu ug tukion kung kinsa ang anaa sa likod niini.
Mopakigtambayayong usab sa DA sa imbestigasyon ang pipila ka budget watchdog, lakip ang mga grupong unang nagbutyag sa sayop nga coordinates.
Kahinumduman nga giangkon na sa DA nga walo sa kinatibuk-ang 1,669 ka farm-to-market road projects nga gilakip sa National Expenditure Program o NEP ang adunay sayop nga coordinates tungod sa encoding errors o sayop nga pag-type sa usa o duha ka numero.
