White House, gilimod nga tangtangon sa puwesto sila Hegseth ug Rubio: Miller, bag-ong Chief of Staff ni Trump
Gipanghimakak sa White House ang mga report nga tangtangon sa puwesto ang pipila ka taas nga opisyal sa gabinete ni US President Donald Trump, lakip na sila Defense Secretary Pete Hegseth ug Secretary of State Marco Rubio.
Mitumaw ang maong mga report human mapakyas ang Republican Party nga makakuha og igong lingkoranan sa kataposang US midterm elections.
Nahisgutan usab ang hulga sa usa ka outgoing Republican congressman nga magduso og impeachment vote batok kang Hegseth.
Gilimod usab ni Rubio ang alegasyon nga mobiya siya sa iyang puwesto aron mangandam sa 2028 presidential elections.
Sa laing bahin,gitudlo ni Trump si Stephen Miller isip bag-ong White House Chief of Staff, puli kang Susie Wiles nga ni-resign human makuha sa Democratic Party ang kontrol sa duha ka kapulungan sa US Congress.
Nailhan si Miller isip usa sa suod ug dugay nang advisor ni Trump, ug nag-unang nagpaluyo sa hugot nga mga polisiya sa administrasyon kabahin sa imigrasyon.
Gisaway sa mga miyembro sa Democratic Party ang iyang pagkatudlo ug gihulagway siyang radikal tungod sa iyang mga kontrobersiyal nga lakang sa pagamhanan.
Samtang, pipila usab ka taas nga opisyal sa US Department of Justice ang mi-resign sa ilang mga puwesto human sa resulta sa eleksiyon.
Sa kasamtangan, nagpabilin gihapon si Trump isip Presidente sa Estados Unidos ug magpadayon ang iyang termino hangtod Enero 2029, gawas kung adunay mahitabo nga constitutional nga proseso nga mosangpot sa iyang sayong pagbiya sa puwesto.
Dili usab direktang mopuli sa iyang posisyon ang Democratic Party bisan pa og nakuha niini ang kontrol sa duha ka kapulungan sa Kongreso. Hinuon, mahimo nang masuta ug masupak sa mga Demokratiko ang mga polisiya ug lakang sa administrasyon pinaagi sa ilang gahum sa Kongreso.
