Nag-apela si US President Donald Trump aron wagtangon ang iyang conviction sa hush money case nga adunay kalabotan sa $130,000 nga gibayad ngadto sa aktres nga si Stormy Daniels sa wala pa ang 2016 presidential election.
Ang maong kantidad gibayad niadtong 2016 pinaagi sa kanhing abogado ni Trump nga si Atty. Michael Cohen, aron dili mogawas sa publiko ang alegasyon ni Daniels nga nakighilawas siya kang Trump niadtong 2006. Gipanghimakak ni Trump ang maong alegasyon.
Niadtong Nobyembre 5, 2026, gipaminaw sa lima ka huwes sa New York appellate court ang argumento sa kampo ni Trump ug sa mga piskal kalabot sa iyang apela. Wala pa magpagawas og desisyon ang korte, ug gilauman nga molungtad pa og usa hangtod duha ka bulan una kini makapasiya.
Nahinumdoman nga kaniadtong Mayo 2024, napamatud-ang sad-an si Trump sa 34 ka kaso sa pagpalsipikar sa mga rekord sa negosyo may kalabotan sa maong bayad, nga giingong gihimo aron dili mogawas ang impormasyon bahin kaniya sa wala pa ang eleksiyon. Gisentensiyahan siya og unconditional discharge, nga nagpasabot nga gipailawom siya sa probation, apan nagpabilin ang iyang conviction isip criminal record.
Duha ang nag-unang basihan sa iyang apela. Una, giingon sa iyang mga abogado nga dili angay gamiton sa lokal nga piskal ang federal election law aron mahimong felony ang usa ka kaso nga angay unta nga misdemeanor. Ikaduha, ilang giangkon nga gigamit sa trial ang mga ebidensiyang sakop sa presidential immunity, lakip ang pipila ka panag-istorya sa White House ug mga post ni Trump sa social media.
Matod sa kampo ni Trump, adunay politikal nga motibo ang pagpasaka sa kaso ug sayop ang legal nga basihan niini. Tumong nila nga hingpit nga mapapas ang conviction ug ang iyang rekord isip napamatud-ang kriminal.
Wala motambong si Trump sa hearing. Kung isalikway sa appellate court ang iyang apela, mahimo pa nga dad-on sa iyang kampo ang kaso ngadto sa pinakataas nga korte sa New York ug posibleng mangayo usab og pagrepaso sa US Supreme Court.
