Posibleng mubarato ang presyo sa gasolina ug diesel sugod Nobyembre 10, 2026, tungod sa paglaom nga matapos na ang gubat sa Middle East human nakadaog ang Democratic Party sa pagkontrol sa Kongreso sa Estados Unidos.
Matod ni Jetti Petroleum President Leo Bellas, gibanabana nga moubos og ₱12.50 hangtod ₱13.50 kada litro ang presyo sa gasolina, samtang ₱4.30 hangtod ₱4.50 kada litro ang posibleng ibawas sa presyo sa diesel.
Gipasabot ni Bellas nga bisan nagpadayon ang kabalaka sa posibleng pagkaputol sa suplay tungod sa mga pag-atake sa Strait of Hormuz ug sa mga pasilidad sa enerhiya sa Saudi Arabia, naglaom ang merkado sa bag-ong paningkamot sa diplomasya aron mahunong ang dugay nang gubat sa Middle East.
Dugang pa niya, nakatampo usab sa pag-ubos sa presyo sa petrolyo ang pagkunhod sa presyo sa krudo ug ang paglaom nga modaghan ang suplay human pahuyangon sa South Korea ang mga pagdili sa pag-eksport sa diesel ug dugangan sa China ang export quota.
Gibasi ang maong pagbanabana sa unang upat ka adlaw nga trading sa Mean of Platts Singapore (MOPS) ug sa lihok sa foreign exchange rate. Ang MOPS maoy basihan sa pagpresyo sa mga pinrosesong produktong petrolyo sa Southeast Asia.
