Gihatagan og dugang nga panahon sa Land Transportation Office (LTO) ang mga motorista nga wala pa makapabag-o sa rehistro sa ilang mga sakyanan nga na-expire gikan Hulyo hangtod Oktubre ning tuiga.
Tumong sa maong extension nga makakompleto sa ilang renewal ang mga apektadong tag-iya sa sakyanan nga wala makahimo niini sulod sa unang gihatag nga palugit, nga dili pa ipatuman ang dugang nga bayranan ug multa basta makasunod sa bag-ong iskedyul.
Subay sa Memorandum Circular No. MVL-2026-5523 nga gipagawas niadtong Oktubre 29, 2026, gitakda sa LTO ang nagkalainlaing deadline depende sa bulan nga na-expire ang rehistro.Alang sa mga rehistrong na-expire niadtong Hulyo ug Agosto, mahimo nang mag-renew sugod Nobyembre 3 hangtod Disyembre 29, 2026.
Samtang, ang mga sakyanang na-expire niadtong Setyembre mahimong mag-renew gikan Disyembre 1, 2026 hangtod Enero 29, 2027. Alang usab sa mga rehistrong na-expire niadtong Oktubre, sugdan ang renewal sa Enero 4 hangtod Pebrero 26, 2027.
Pinaagi niini, gilauman nga makalikay ang mga motorista sa dugang nga gasto nga mahimong ipatuman tungod sa pagkalapas sa gitakdang panahon sa renewal.Bisan pa niini, gipahimangnoan sa LTO ang mga tag-iya sa sakyanan nga kinahanglan nilang masunod ang bag-ong iskedyul kay ang mga mapakyas gihapon sa pag-renew sulod sa gihatag nga extension pasakaan na sa katugbang nga bayranan ug multa.
Busa, giawhag ang mga motorista nga susihon ang expiry date sa ilang rehistro ug unahon ang pagproseso sa renewal aron malikayan ang dugang nga gasto ug posibleng problema sa paggamit sa ilang mga sakyanan sa dalan.
