Nagpatuman na og adjusted class schedule ang mga eskwelahan sa tibuok Davao Region aron mapanalipdan ang mga estudyante ug mga personahe batok sa posibleng epekto sa grabeng kainit sa panahon.
Gikumpirma ni Department of Education (DepEd) XI spokesperson Jenielito Atillo nga managlahi ang iskedyul nga gisagop sa matag eskwelahan depende sa ilang kahimtang ug panginahanglan, ug giaprobahan kini sa tagsa-tagsa ka Schools Division Superintendent.
Sumala ni Atillo, tumong sa maong lakang nga mapanalipdan ang panglawas sa mga estudyante ug school personnel tungod sa grabeng kainit nga nasinati karon.
Lakip sa mga eskwelahan sa Davao City nga nagpatuman niini ang Kapitan Tomas Monteverde Sr. Central Elementary School o KTMSCES nga nahimutang sa C. Bangoy Street, Poblacion District. Base sa impormasyon gikan sa security guard sa maong tulonghaan, magsugod ang klase alas-7:00 sa buntag, samtang gibahin-bahin ang oras sa dismissal depende sa lebel sa mga estudyante.
Alas-10:00 hangtod alas-10:30 sa buntag ang dismissal sa Grade 1 ug Grade 2, samtang alas-11:00 hangtod alas-11:30 sa buntag alang sa Grade 3.Sa hapon, alas-1:00 hangtod alas-2:00 ang dismissal sa mga estudyante sa Grade 4, Grade 5 ug Grade 6.
Gikumpirma usab sa security guard nga luwas ang mga estudyante ug wala pay na-report nga dili maayong insidente sa maong tulonghaan. Giawhag usab ang mga eskwelahan nga siguruhon ang igong bentilasyon ug access sa tubig-inom aron malikayan ang dehydration ug uban pang sakit nga mahimong resulta sa grabeng kainit sa panahon.
