Nagpahinumdom ang Department of Labor and Employment o DOLE sa mga employer sa hustong pagpasweldo sa ilang mga empleyado karong Nobyembre 2, 2026 o All Souls’ Day, nga gideklarang Special Non-Working Day.
Base sa Labor Advisory No. 18 sa DOLE, ipatuman ang “no work, no pay” policy alang sa mga empleyadong dili motrabaho sa maong adlaw, gawas kung adunay mas paborableng polisiya ang kompanya.
Samtang, ang mga empleyadong motrabaho makadawat og dugang nga 30% sa ilang adlawang sweldo alang sa unang walo ka oras nga trabaho.
Kung molapas sa walo ka oras ang ilang trabaho, makadawat sila og dugang nga 30% sa ilang hourly rate alang sa overtime.
Alang sa mga empleyadong motrabaho sa ilang gitakdang adlaw nga pahulay, makadawat sila og dugang nga 50% sa ilang adlawang sweldo alang sa unang walo ka oras.
Pag molapas usab sa walo ka oras, adunay dugang nga 30% sa ilang hourly rate alang sa overtime work.
Sa laing bahin, mahimong mosumite og Request for Assistance ang mga empleyadong wala makadawat sa hustong holiday pay pinaagi sa DOLE Assistance for Request Management System o ARMS sa arms.dole.gov.ph, o personal nga moduol sa labing duol nga DOLE o Single Entry Assistance Desk.
Mahimo usab silang motawag sa DOLE Hotline 1349 alang sa dugang nga impormasyon ug giya.
Ang mga reklamo nga ipailalom sa Single Entry Approach o SEnA pagadumalahan pinaagi sa 30 ka adlaw nga mandatory conciliation-mediation aron hatagan og higayon ang empleyado ug employer nga husayon ang ilang panaglalis. Kung dili magkaangay, mahimong i-refer ang reklamo ngadto sa angay nga opisina o ahensya alang sa sunod nga legal nga proseso.
Pahinumdom sa DOLE sa mga employer nga sundon ang hustong computation sa sweldo aron masiguro nga makadawat ang mga empleyado sa angay nilang bayad subay sa balaod.
