Gipasidunggan sa Provincial Government of Davao del Norte ang mga lokal nga filmmaker sa nagkalainlaing bahin sa Davao Region atol sa pagpahigayon sa 3rd DavNor Short Film Festival Awards Night niadtong Oktubre 30, 2026.
Pinaagi sa maong kalihokan, gipasiugda ang mga mubo nga salida nga nagtumong sa pagpataas sa kahibalo sa publiko kabahin sa Online Sexual Abuse or Exploitation of Children o OSAEC, ug Child Sexual Abuse or Exploitation Materials o CSAEM.
Gikan sa 27 ka production team nga miapil gikan sa nagkalainlaing lugar sa Davao Region, nakadaog isip Best Film ang pelikulang “Player 4Ps” nga gihimo sa Magnates Media.
Samtang, nakuha sa pelikulang “Mama, Mama” sa Emsquared ang ikaduhang puwesto, ug gisundan kini sa “Krayola” sa SEENIfiles nga nakadaog isip ikatulong Best Film.
Dugang pa, giila sa kapitolyo sa probinsya ang kahanas ug talento sa mga filmmaker nga migamit sa pelikula isip pamaagi sa pagpahibalo ug pagpalig-on sa kampanya alang sa pagpanalipod sa mga kabataan.
Lakip sa tumong sa maong kalihokan ang pagdasig sa komunidad nga molihok ug moapil sa pagpugong sa tanang matang sa pagpang-abuso ug pagpahimulos sa mga bata.
Sa maong festival, gipakita usab ang papel sa industriya sa pelikula dili lamang isip tinubdan sa kalingawan, kondili isip epektibong paagi sa paghatod sa makahuluganon nga mensahe ug pagpukaw sa kahibalo sa publiko kabahin sa kaluwasan ug katungod sa mga kabataan.
