Nagtuo ang kampo ni Senador Bato dela Rosa nga adunay mas dagkong mga isyu nga angay hatagan og pagtagad sa gobyerno imbes nga magpokus sa isyu sa posibleng pagdakop sa mambabalaud.
Sumala kang Atty. Israelito Torreon, legal counsel sa senador, posibleng gigamit lamang ang maong isyu isip kabahin sa gitawag niyang political circus aron mabalhin ang atensyon sa publiko gikan sa tinuod nga mga problema sa nasud.
Dugang pa ni Torreon, dili unta angay kalimtan sa publiko ang kontrobersiya sa giingong mga iregularidad sa flood control projects, ang problema sa ilegal nga droga ug uban pang mga isyu nga nagkinahanglan og aksyon sa gobyerno.
Matod pa niya, mao kini ang mga butang nga angay hisgotan ug hatagan og prayoridad aron masulbad, imbes nga ang impeachment trial sa Bise Presidente ug ang isyu sa pagdakop kang Senador dela Rosa.
Sa pagkakaron, wala pa madakpi si Senador Bato dela Rosa ug padayon siyang gipangita sa mga awtoridad human giisyu ang arrest warrant batok kaniya sa International Criminal Court o ICC.
Lakip si Dela Rosa sa mga ginganlan nga co-perpetrator ni kanhi Pangulong Rodrigo Roa Duterte may kalabotan sa pagpatuman sa kampanya batok sa ilegal nga droga sa miaging administrasyon.
Atubang sa kaso nga crimes against humanity sa maong internasyonal nga korte ang duha, apan si kanhi Pangulong Duterte lamang ang anaa sa The Hague, Netherlands, samtang wala pa maaresto si Dela Rosa.
