Nanawagan ang People’s Budget Coalition sa Senado nga tangtangon sa gisugyot nga 2027 national budget ang mga proyektong gidugang sa Kamara nga wala kunoy igong dokumento nga mahimong susihon sa publiko.
Sa pagdungog sa Senate Finance Committee kaniadtong Lunes,Oktubre 26, 2026 gibutyag sa grupo nga hapit 7,000 ka proyekto nga nagkantidad og ₱190 bilyon ang giingong walay gikinahanglang dokumento nga makahatag og katin-awan kabahin sa maong mga proyekto.
Sumala kang coalition co-convenor Kenneth Ibasco Abante, wala kini nagpasabot nga adunay problema ang tanang proyekto. Apan, kinahanglan nga ipakita ang mga adunay kalabotang dokumento aron masiguro nga gisunod ang hustong proseso. Gihangyo sa grupo ang Senado nga dili iapil ang mga proyektong walay kompletong papeles, ug nanawagan usab kini sa Presidente nga dili aprobahan ang maong mga alokasyon.
Dugang pa, milapas sa ₱1 trilyon ang mga alokasyong adunay posibleng red flags sa gisugyot nga badyet. Lakip niini ang ₱695 bilyon nga gitawag nilang “hard pork,” ₱210 bilyon nga “soft pork,” ug ₱112 bilyon nga unprogrammed appropriations.
Gipasiugda sa coalition ang panginahanglan sa igo nga dokumentasyon ug impormasyon aron masubay sa publiko kung giunsa paggasto ang buhis sa katawhan.
