Kompleto na ang Underground Cabling Project sa tibuok bahin sa Ramon Magsaysay Avenue, nga mas nailhang Uyanguren Street, sa downtown Davao City, diin wala na ang mga poste ug nagbitay nga mga kable sa kuryente ug telekomunikasyon.
Base sa news release sa Davao Light kaniadtong Oktubre 29,2026 nahuman ang proyekto niadtong Hunyo 2026 human ipatuman sa duha ka hugna. Ang unang hugna nga naglangkob sa 700-metros nga bahin gikan sa Davao City Central Post Office hangtod sa eskina sa Chavez Street nahuman niadtong Marso 2025.
Samtang, nahuman niadtong Hunyo 2026 ang ikaduhang 700-metros nga bahin gikan sa eskina sa Suao Street hangtod sa Quezon Boulevard, duol sa Magsaysay Park.Sumala kang Councilor Louie John J. Bonguyan, Chairperson sa Committee on Energy sa Davao City Council, dugay na niyang pangandoy ang pagpatuman sa susamang proyekto aron mapalambo ang dagway sa siyudad.
Gilauman nga mas mapanindot sa proyekto ang dagway sa siyudad ug mas makadani kini og mga turista ug investors tungod sa pagkawala sa nagkagubot ug nagbitay-bitay nga mga kable o gitawag nga spaghetti wiring.
Dugang pa, makatabang usab ang underground cabling sa pagpalambo sa kaluwasan sa publiko pinaagi sa pagtangtang sa mga kable nga posibleng mahulog o makababag sa mga dalan ug agianan.Gipatin-aw ni Davao Light President Enriczar Tia nga ang pagbutang sa mga linya ilalom sa yuta makapakunhod usab sa wala damhang pagkawala sa kuryente tungod kay dili na direktang maapektuhan sa kilat, langgam ug uban pang butang ang mga linya.
Nagpasalamat usab si Tia ang panag-alayon sa lokal nga panggamhanan, mga utility provider, telecommunications companies, pribadong sektor ug mga residente nga mitabang sa pagkompleto sa proyekto.
Tumong sa maong inisyatiba nga mapalambo ang imprastraktura ug dagway sa Davao City, ug mahimong pananglitan sa ubang lokal nga panggamhanan sa nasud. Samtang, lakip sa sunod nga mga target nga lugar sa underground cabling initiative ang Quirino Avenue ug Ponciano, Pelayo Street, diin plano usab nga tangtangon ang mga nagbitay nga kable sa ibabaw sa dalan.
