Narekord sa Armed Forces of the Philippines (AFP) ang 54 ka barko sa China sa nagkalainlaing bahin sa West Philippine Sea (WPS) gikan Oktubre 20 hangtod 26, 2026, mas taas kumpara sa 31 ka barko nga namatikdan sa miaging semana.
Sumala ni AFP spokesperson for the WPS Rear Admiral Roy Vincent Trinidad, lakip sa mga namonitor ang mga barko sa People’s Liberation Army Navy (PLAN) ug China Coast Guard (CCG).
Adunay 17 ka barko ang namatikdan sa Bajo de Masinloc, 16 sa Pag-asa Islands, 14 sa Ayungin Shoal ug pito sa Escoda Shoal.
Sa breakdown sa AFP, 11 sa mga barko sa Bajo de Masinloc iya sa CCG ug unom sa PLAN. Sa Pag-asa Islands, 12 ang CCG ug upat ang PLAN; sa Ayungin Shoal, pito matag ahensiya; samtang duha ang CCG ug lima ang PLAN sa Escoda Shoal.
Gibutyag usab sa AFP nga wala mitubag ang mga barko sa China sa radio challenges sa militar sa Pilipinas, apan sumala ni Trinidad, kasagaran na kini nga binuhatan sa mga barkong Tsino.
Samtang, kaniadtong Oktubre 22, na-monitor usab sa AFP ang pag-agi sa Chinese aircraft carrier strike group nga gipangulohan sa Liaoning sa kadagatan duol sa Mindanao, gikan sa Zamboanga del Norte padulong sa Celebes Sea. Giklaro sa AFP nga kabahin kini sa mga ehersisyo sa China ug wala angay ikabalaka.
Bisan pa sa pagsaka sa ihap sa mga barko, gipasalig sa Philippine Navy ug Philippine Coast Guard nga magpadayon ang ilang pagpatrolya aron mapanalipdan ang mga Pilipinong mangingisda ug mabantayan ang katungod sa nasud sa maong katubigan.
Nagpadayon ang tensiyon sa WPS tungod sa halapad nga pag-angkon sa China sa maong katubigan, diin adunay nag-overlap nga territorial ug maritime claims ang pipila ka nasod, lakip ang Pilipinas.
Kahinumdoman nga niadtong 2016, nagdesisyon ang arbitral tribunal ubos sa United Nations Convention on the Law of the Sea nga walay legal nga basihan ubos sa maong convention ang pag-angkon sa China sa historic rights sulod sa nine-dash line. Apan, wala giila sa Beijing ang maong desisyon.
