Gihangyo ni ACT Teachers Representative Antonio Tinio ang House of Representatives nga i-recall ang ilang bersiyon sa proposed ₱7.2 trilyong 2027 national budget aron matul-id ang mga probisyon nga posibleng supak sa Konstitusyon.
Sumala kang Tinio, deputy minority leader sa Kamara, kinahanglan nga ang tibuok House of Representatives mismo ang motul-id sa mga probisyon nga susama sa mga lagda sa nangaging budget nga gideklarang supak sa Konstitusyon sa Supreme Court, lakip ang mga pamaagi sa pag-apod-apod sa pondo nga nalambigit sa flood control corruption scandal.
Gipasidan-an niya nga posibleng adunay depekto sa Konstitusyon ang 2027 budget tungod sa pagsagop niini sa susamang standby funding provision sa 2026 budget. Gisupak usab niya ang kabalaka nga ang pag-recall mahimong makapalangan sa pag-apruba ug mosangpot sa reenacted budget.
Kahinumdoman nga gikumpirma sa Korte Supema nga dili balido ang pipila ka probisyon sa 2024, 2025 ug 2026 national budgets, lakip ang ₱449.5 bilyong pagdugang sa unprogrammed appropriations sa 2024 budget, ₱17.99 bilyon sa Special Road Fund sa DPWH sa 2025 budget, ug ₱12.75 bilyon sa Special Accounts in the General Fund sa 2026 budget.
Samtang, mipasalig ang Department of Budget and Management (DBM) nga mosunod sa desisyon sa Korte Suprema kabahin sa unprogrammed appropriations sa 2026 budget, apan giklaro nga mahimo gihapong ipatuman ang mga probisyon nga wala maapektohi sa desisyon, subay sa balaod ug hustong kondisyon sa pagpondo.
