Gipanghimakak sa Philippine Air Force (PAF) ang mga taho nga daan na ang SF-260 training aircraft nga nag-bangga sa kahanginan sa Lipa, Batangas, nga miresulta sa pagkamatay sa upat ka piloto kaniadtong Biyernes, Oktubre 23, 2026.
Matud ni PAF spokesperson Colonel Alvin Jay Capinguian, gipalit ang maong mga eroplano niadtong 2010 hangtod 2011 ug aduna pa kini’y nahibiling mga tuig nga magamit sa serbisyo. Gipasabot niya nga ang operational capability sa usa ka eroplano dili ibase sa edad, kondili sa gidaghanon sa operating hours nga nahuman na niini.
Ang upat ka piloto nga namatay sa maong aksidente: si Maj. David Joshua Rojo, Capt. Raymart Cabangcala, Capt. Ma. Melvin Acebuque, ug 1st Lt. Angeleo Adrian Peñaflor. Ang mga piloto nagpailalom sa advanced upgrade training ug dili mga flight student.
Samtang, nagpabiling grounded ang nahibiling 15 ka SF-260 aircraft isip lakang sa pagpanalipod sa kaluwasan samtang nagpadayon ang imbestigasyon sa aksidente.
Nagmugna na og usa ka specialized safety investigation board aron susihon ang posibleng mga hinungdan sa pagbangga, lakip ang kahimtang sa panahon, materyal nga kondisyon sa mga eroplano, suplay sa fuel ug oil, flight planning, ug pilot training.
Gipasaligan usab sa PAF, ubos sa pagpanguna ni Commanding General Lt. Gen. Arthur Cordura, nga susihon ang mga training ug safety protocol aron mapugngan ang susamang aksidente sa umaabot.
Sa kasamtangan, gihatagan og full military honors ang mga namatay nga piloto, ug nagpadayon ang paghatag og tabang sa ilang mga pamilya.
